Inkqubo yebhrakfesi yoMhlobo Wenene FM, iBreakfast Eyondlayo Ekuseni (BEE) ibhiyozela iminyaka elishumi elinesithandathu itshotsh’ entla ngokuvusa izigidigidi zamakhaya oMzantsi Afrika ngendlela eyodwa.
Le nkqubo iqale ukusasaza ngomhla wokuqala kuApril ka2010 – nyaka lowo uMzantsi Afrika wawusingathe iNdebe yeHlabathi yebhola ekhatywayo.
Umbhexeshi wayo ngoko yayinguPutco Mafani, ngelixa uPastor Nozewu engumqulunqi, ze uMluleki abe kwidesika yezemidlalo. UMafani ebeyinxalenye yemibhiyozo ebibanjelwe estudiyo ngoLwesibini, umhla wokuqala.
UPhiwe Nozewu, owaziwa njengo PastorTheDJ, osele engumbhexeshi wale nkqubo, uMafa Bavuma okhapha umbhexeshi, uMluleki “Coach” Ntsabo kwezemidlalo noReggie Solani ongumqulunqi, bathethe ngendlela le nkqubo ebutshintshe ngayo ubomi babo.
“Sikwazile ukugcina inkqubo ithandwa, kwaye sagcina amanani enkqubo ephezulu kususela oko uPutco wayishiya inkqubo. Singathanda ukubulela abaphathi ngokusinika omnye unyaka. Sifuna ukuzibethelela kulo unyaka, sibonise into yokuba asifikanga kwi-16 yeminyakangempazamo, sikusebenzele ukufikelela kule ndawo sikuyo. Kusekuninzi ke esisafuna ukwenza, ukukhulisa amanani nokuzuza intlonipho kwabo sikhuphisana nabo,” kutsho uPastorTheDJ.
UMafa uthethe wathi, “Ayiyo nto iqhelekileyo ukuba inkqubo kanomathotholo itsale iminyaka emingaka emoyeni, loo nto iyasibonisa ukuba kunento ebalulekileyo ngeBEE. Ithetha ukuba abaphulaphuli bethu abakadikwa sithi, njengoko besixelela xa sidibana nabo nakumakhasi onxibelelwano,” kutsho uMafa, ebalula indlela abasebenzisana ngayo enkqubeni njengento eyenza inkqubo yabo ithandwe.
uCoach uthethe wenjenje: “Kule minyaka ndifunde lukhulu koogxa bam. Ndisajonge phambili ukonwabisa, ukufundisa nokuza nolwazi umphulaphuli aludingayo, ingakumbi kwezemidlalo.”
Umqulunqi wenkqubo, uReggie uthe: “ Yinto enkulu kum ukuzibandakanya neqela leBEE ekudala liqhuba. Ukuya phambili siseza kwenza izinto ezintle kakhulu. Sibahlekisile, sabonwabisa abantu kwaye sabanika Ithemba. Ezo zizinto ezindivise kamnandi njengomqulunqi.”
Halala BEE! Halala!
